Kafian Mastan Khan Mastan

پنجابی کافیاں مستن خان مستن

1. مونجھان سدا سانوں دلبرا

مونجھان سدا سانوں دلبرا،
کیتو ایہہ کیا سانوں دلبرا ۔
جادو کیتو یا کوئی منتر ماریو،
کجھ تاں ڈسا سانوں دلبرا ۔

اٹھدیاں بہندیاں چین نہ آوے،
لائی ہے بھا سانوں دلبرا ۔
عشقَ مصیبت سندے ہاسے،
ڈتو ڈکھا سانوں دلبرا ۔

غم فکر سے درد اندیشے،
گئے نے کھا سانوں دلبرا ۔
دل اداسی رہندا ہے ہردم،
کائی ہے بلا سانوں دلبرا ۔

جھول پیالہ ڈکھاں سولاں دا،
ڈتو پوا سانوں دلبرا ۔
روندی کھاندی پاد ورہاں دے،
گئے نے وہا سانوں دلبرا ۔

آکھاں کیا، تینڈڑی ٹور ادا نے،
لٹّ گھدھا سانوں دلبرا ۔
نال غیراں دے قول پلیندے،
ناہیں نہ ہا سانوں دلبرا ۔

عشقَ بیماراں نوں درد ہزاراں،
دارو پلا سانوں دلبرا ۔
دلوں دغا مونہوں مٹھا گھالیں،
گھدھو ولا سانوں دلبرا ۔

غماں باجھوں عشقَ تینڈے وچوں،
کجھ نہ لدھا سانوں دلبرا ۔
ڈوس نہ کوئی تیں تے ہے ماہی،
ملیا لکھیا سانوں دلبرا ۔

مفت بدنامی ملیئم ماہی،
گھتیو جھنکا سانوں دلبرا ۔
لمبڑی منزل پائیو ماہی،
گھتیو تھکا سانوں دلبرا ۔

روز میثاق دی سک تے ہاسے،
کیتو جدا سانوں دلبرا ۔
دے کے دلیڑے دل دے کھسیندا ایں،
نہ روا سانوں دلبرا ۔

باجھ تینڈے ماہی نہیں کجھ بھاندا،
قسم چوا سانوں دلبرا ۔
مستن یار کدی ہس کے نہ بولیوں،
منہ تاں ڈسا سانوں دلبرا ۔